السلام عليكم ورحمة الله وبركاته
*واحد عمرو 20 سنة ، سكر وروّح للدار ، فاق بيه بوه ، هبط عليه بطريحة نبّاش القبور...ما تحملهاش ..وقال كيفاش بابا يضربني وانا عمري عشرين؟؟ فكر فكّر ومن بعد لقى حل يفرهدوا..مشى للكانكايوري ( متجر بيع المواد الحديدية ) وشرى شيطة وحكة دهن بوكيلو ، وطلع فوق السطح وكتب فوق دارهم بالكبييييييييييير :
هنا مقر طالبان ...
***************************
*تاجر عبى كميونة اسيزي بالبرتقال من الوطن القبلي وتوجه للجنوب التونسي باش يبيعو...بعدما فات القيروان في اتجاه الصخيرة فمة طريق طولو تقريبا 160 كم مافيهيهش برشة سكان، تنجم تقول خالي ..جاتو الكميونة في نص الطريق وفي طمبك القايلة وتفلقتلو عجلة، هبط بكل برودة دم باش يصلحها ، على خاطرو قبل الخروج تفقد العجلة الاحتياطية ، لكنو ما لقاش "الكريك" {يا والله مشكلة ** بدأ صاحبنا يوقف في الكراهب ..والسخانة عمال وتزيد..شيء ما فمة حتى كميونة تعدّات ..هاو بعد اربعة سوايع وقفتلو كميونة على بعد 800 متر وسائقها ما وخّرش .فتوجه اليه ماشيا وهو يحكي مع نفسو ويقول :
** زعمة وقفلي هذا لسواد عيني؟؟أكيد يحب نعطيه صاك برتقال "طمسون" تي نعطيه خير م الي نبقى ملوح في الخلاء
*وكيف يطلب مني زوز صيكان ...امممم ،،،تي نعطيه آش باش نعمل
*وكيف يقولي هبط قاجو...اه..زعمة يكون طماع ؟؟ تي نعطيه خير من الي تفسد السلعة
* وكيف يطلب مني زوز قاجوات؟؟ مزمّرة الحكاية ؟؟ آش باش نصوّر أنا ؟؟
ووقتها وصل للكميونة الي وقفتلو ، مولاها مخرج راسو من الشباك وسألو : حاجتك بحاجة ؟
رد عليه طول : برّ زمر انتي والكريك متاعك {صافا ؟؟؟؟**
*زوز أصحاب عاملين "كامبينغ" على شط البحر ..ناصبين خيمة ومفرشين تحتها وقرروا باش يعديوا اسبوع هكاكة سباحة ونوم ..ليلة من الليالي ، وهوما راقدين ..واحد راقد على وجهو والآخر على ظهرو..فاق هاك الي راقد على بطنو يلقى صاحبو لاخر فايق حتى هو زادة..سالو: فايق؟ قالو: إيه فايق ما جانيش النوم .. سألو: وفاش تشوف توه؟ قالو: في النجوم ..سألو: في النجوم؟؟ وآش يدل هذا؟ رد عيه: يدل الي ربّي خلق برشة كواكب والي ما نعرفوا منها كان القليل ، رد عليه وقالو: قوووووووووووم،، معناها سرقولنا الخيمة يا مصطك ....
*تلميذ من حي شعبي ياسر فقير ..روح من المكتب يبكي وقال لبوه (طبعا يلقاه في الدار ، فين عندو باش يمشي ،؟ بطّااااااااااااااال ) قالو: بابا ، انا اليوم جاوبت صحيح والمعلم ضريني ضرب موش نرمال ..الاب كان ممدود وقف، قالو : متأكد يا ولدي جاوبت صحيح وهو ضربك ؟؟ قالو : إينعم ، متأكد يا بابا..شد ولدو من يدو وقالو : إيج نمشيوا للمكت متاعك ..وهوما في الطريق سأل الولد بوه: بابا ، 5 نطرحوا منها 5 آش يبقى؟ جاوب البو : قال يبقى كان الصبر ..وهنا فرح الولد وقال" حتى أنا جاوبتو كيفك معلمي..مشى ضربني ومسح بيّ القاعة ..
*واحد راكب في الكار شاف طفلة ياااااااااااااااسر شبابة ..بقى يخزرلها وما نجمش يكلمها ..كيف جات المحطة متاعها هبطت وهبط هو وراها وجبد ورقة وقيّد عليها ......نومرو الكار ....
*بوكشاش تعرّف على بوكشاشة..قالتلو : إحكيلي على نشأتك..تنهّد وقاللها: كنت تمساااااااااح أما السهر والشُّرب هلكوني ..
*واحد سكران طلع من البار (حاشا الشهر) في نص الليل ..وقّف تاكسي ، العداد متاعها سجّل 480 مليم (دارو قريبة برشة ) عطى للسائق 500 مليم وقاعد يستنى في الباقي (20 مليم) قالّو السائق: والله ما عنديش الصرف الرقيق ..قال السكران: باهي إعملّي بيها ضربات كلاكسون ...
*فما واحد سرق دجاجة و مش لبحر بش ياكلها شعل النار نحلها ريشها و شوها فاقوا به اشرطة قالول إنت سرقة إدجاجة قلهم لا قالول شنوا اريش هدا قلهم دجاجة دخلت تعوم خلتو بحدي
*واحد عندو "دو شوفو" يمشي بيها في الأوتوروت..ضاغط على السرعة للآخر أيا العدّاد وصل للستين..تعدّلت واحدة "بورش" تمشي في الــ250كم/س صحيبنا حل الباب وهبط ...يسخايل روحو واقف
*واحد عندو "دوشوفو" ماشي على روحو في الأوتوروت..يعمل هكة وموتورها وقف ..حاول باش يصلّحو ..شيء ، الموتور متبلوكي ..أيا وقف يعمل في أوتوستوب باش يجيب ميكانيكي ..وطبعا صعيب يوقفولوا السوّاق..السيارات الكل تجبد في سرعة مهولة..هاو بعد سويعة وقفتلو سيارة "فراري" هبطلو سائقها وسألو: شبيها "التحفونة" (في إشارة للدوشوفو) قالو: موتورها تبلكج ..قالو: باهي أربطها بهذا الحبل وهات نكركرك..الراجل قالو : مشكور جدا ، لكن ما يجيش منو "فراري" تكركر "دو شوفو" جاوبو: يزيك بلا مركبات نقص، تي هذيكة كرهبة ومتاعك كرهبة ،، يزي والله إلاّ ما تربطها ووالله إلاّ ما نوصلك لأقرب ميكانيكي..سائق "الدوشوفو" ما لقاش بيها وين ، مشى ربط سيارتو..وقبل الانطلاق قال صاحب الفراري لسائق الدوشوفو: حويجة بركه نوصّيك عليها ، أنت أكيد تعرف الي الفراري كراهب متاع جري، ربما نسهاش على روحي ونفوت الــ70 كم/س أنت وقتها أضربلي "كلاكسون" والا أعملي "ابّال " متاع "فار" باش أنا انقص..أوكي..ومشاوا...هاو كرهبة "بورش " متعدية تجري في 230ك/س نسى سائق الفراري انو يكركر في "دوشوفو" عمل هكة وهات يا نده..160،،،180،،،200،،،240،،،260،، تعداوا قدام عون حرس في دورية ، هاك العون جبد التلفون"التولكي ولكي " وكلّم عرفو وقالو :
-ألو حضرة الرائد ، انا تو في الاوتوروت وتعداو زوز كراهب واحدة بورش وواحدة فراري يجريوا في 280كم/س
-عادي، ماهم كراهب متاع جري ..من شنوه انت متقلق ؟
_الي مقلقني ، بيناتهم "دوشوفو" يكلاكسوني ويشعل في الضوء ، يحب يدوبل عليهم ...
*واحد زار الطبيب وقالو: راسي من الليل لليل يوجعني
الطبيب: ترقد وتخلي الشباك مفتوح والا مغلق؟
المريض: مغلق
الطبيب: تراه جرب ارقد الليلة وخليه مفتوح وغدوة ارجعلي
********************
رجعلـــــــــــــــــــــــــــــــــو غدوة
*********************
الطبيب: ما زال راسك يوجع فيك؟
المريض: لا ـ تنحات وجيعة راسي ، وتنحّات التلفزة ، والبارابول، والغسالة ، والذهيبات متاع المرا ....
--------------------------------------------------------------------------------
*كلب صارلو إكتئاب حاد،، لأنو اكتشف انو نبح لمدة ساعتين على "بكّوش" ..
ثعبان زادة وقعلو إكتئاب حاد ، لانو حب أفعى حُب لا يوصف ، وفي الآخر طلعت "لقشة " متاع خرطوم ماء ..
قطوس ضربو وليد متوحّش بحجرة على راسو، ترهوج ترهويجة هي بيدها ، ووقف في راس الشارع وهو يقول:
- زعمة هب هب ؟؟
-زعمة موووووووووو
-زعمة حيحااااااااا
أيا بره نقول "بااااااااع" حتى يأتي ما يخالف ذلك .
اتمني ان تنال اعجابكم
لا ترحل دون ترك ردود مشجعة
